ඉරාන තානාපති ආචාර්ය අලිරේසා ඩෙල්කොෂ් මහතා ඊයේ (25) දින ජනාධිපති කාර්යාලයේදී ජනාධිපති අනුර කුමාර දිසානායක මහතා හමු වී තිබේ .
පසුගිය ජනාධිපතිවරණ ජයග්‍රහණය වෙනුවෙන් ජනාධිපතිවරයා වෙත හෘදයාංගම සුබපැතුම් පළ කළ තානාපතිවරයා ඉරාන ජනාධිපති මසුද් පෙසෙෂ්කියාන් (Masoud Pezeshkian) මහතාගේ විශේෂ සුබපැතුම් පණිවිඩය ද ජනාධිපති වෙත පිළිගන්වා තිබේ.
මැදපෙරදිග වත්මන් ආර්ථික සහ දේශපාලන තත්ත්වය පිළිබඳව ද මෙහිදී අවධානය යොමු කෙරුණු අතර ශ්‍රී ලංකාවේ වත්මන් ආරක්ෂක පියවර පිළිබඳව ජනාධිපතිවරයා විසින් ඉරාන තානාපතිවරයාව දැනුවත් කර තිබේ .
මෙරටට පැමිණෙන සංචාරකයන්ගේ සහ මෙරට ජනතාවගේ ද ආරක්‍ෂාව තවදුරටත් සහතික කිරීම සඳහා මේ වන විට අවශ්‍ය සියලු පියවර ගෙන ඇති අතර රට තුළ සුරක්ෂිත පරිසරයක් පවත්වාගෙන යාම සඳහා ශ්‍රී ලංකාව කැප වී සිටින බව ජනාධිපතිවරයා මෙහිදී අවධාරණය කර සිටියේ ය.
ශ්‍රී ලංකාව සහ ඉරානය අතර පවත්නා දීර්ඝකාලීන ද්වීපාර්ශ්වීය සබඳතා පිළිබඳව ද මෙහිදී සිහිපත් කෙරුණු අතර නව ක්ෂේත්‍ර රැසක් ඔස්සේ ඉරාන – ශ්‍රී ලංකා සබඳතා ශක්තිමත් කර ගැනීම තම අරමුණ බව ජනාධිපති වරයා වැඩිදුරටත් සඳහන් කර සිටියේ ය .
ඒ පිළිබඳව සුබවාදී ලෙස අදහස් දැක්වූ ඉරාන තානාපතිවරයා වෙළඳාම, තාක්‍ෂණය, සංස්කෘතිය සහ අධ්‍යාපනය යන ක්ෂේත්‍රවල නව වැඩසටහන් සඳහා ශ්‍රී ලංකාවට සහාය ලබා දෙන බවට ද සහතික වී තිබේ
